බොමුද රස්නෙට කැද කෝප්පයක්

බොමුද රස්නෙට කැද කෝප්පයක්

මේක නියම කැඳ හැලියක්

කෝකියො ගොඩයි ගොඩයි

දර දාන්න රස බලන්න

වටේට තව ගොඩයි ගොඩයි

ඉස්සර නිල් පාටට කොළ පාටට

කැද හැලි දෙකක් කියල

අපිට කියල

මහත්තුරුනි

එකම මෙනු එක

රස පොඞ්ඩක් වෙනස් කරලා

මාරුවෙන් මාරුවට ලිප් දෙකට

අපි පණ දාගෙන ගිණි පිම්බ

රස අප්සට් යන වෙලාවට

රතු පාටින් ලූණු ගම්මිරිස්

වැඬේ ගොඩදාල දුන්න

දේශපේ‍්‍රමී කැද

ප‍්‍රජාතන්ත‍්‍රවාදී කැද

සිංහළ ජාතිය රැකගන්න කැද

ජාතික සංහිඳියාවට කැද

ජනවාරි 8 විප්ලවේ කැද

මහින්ද සමඟ නැගිටල බොන කැද

හෘදසාක්ෂියෙ කැද

ඔක්කොම එකයි මගෙ සඳ

හැමදාම බීල

අපිට සරමෙ බඩයන

උන්ගෙ කැද නෙමෙයි

අපි හදමුද අපේ සුප් එකක්

දැන් නෙමෙයි පස්සෙ කිය කිය

ප‍්‍රායෝගිකව හැදිගෑව කැද හැලිය

බාලගිරි දෝෂෙ සුප් එකට

ඇතිනේද මදි නැද්ද

හැමදාම පරණ කැදහැළියට බැන බැන

ඒකම අරන් ඒවි අළුත් කිය කිය

දොරට තටටු කරල අහාවි ආයෙම

බොමුද රස්නෙට කැද කෝප්පයක්

මෝල්ගහ තියෙන්නෙ කුස්සියෙ

(රිවිහාර පින්නදූව)